Gjykata e Posaçme Kundër Korrupsionit dhe Krimit të Organizuar (GJKKO) ka marrë sot vendimin për të lënë në fuqi masën e sigurisë “arrest në burg” për kryetarin e Partisë së Lirisë, Ilir Meta. Kërkesa e Metës për zëvendësimin e masës me një tjetër më të butë, si arrest shtëpie ose detyrim paraqitjeje, është rrëzuar nga Apeli i GJKKO-së.
Vendimi u mor pas një seance që u zhvillua në mungesë të Ilir Metës, i cili u përfaqësua nga avokati i tij, Kujtim Cakrani. Avokati Cakrani u shpreh se e kishte braktisur seancën, pasi e dinte që vendimi ishte marrë paraprakisht, duke e cilësuar atë si të motivuar politikisht.
Ky vendim vjen pas përfundimit të hetimeve nga Prokuroria e Posaçme (SPAK) më 4 gusht, ku Ilir Metës iu komunikuan akuzat për korrupsion, pastrim parash dhe fshehje pasurie. Hetimet e SPAK janë fokusuar në dy dosje kryesore: ajo e lobimit të Partisë së Lirisë (ish-LSI) në SHBA dhe afera “CEZ-DIA”.
Ilir Meta u arrestua më 21 tetor 2024 dhe që prej asaj kohe ndodhet në qeli. Sipas SPAK, akuzat rëndojnë edhe ndaj ish-bashkëshortes së tij, Monika Kryemadhi, nënës së saj, Fatimja, dhe dy bashkëpunëtorëve të tjerë, Ema Çoku dhe Pirro Xhixho. Përveç Metës, i cili mbetet në burg, ndaj personave të tjerë të hetuar është vendosur masa e sigurisë “detyrim paraqitjeje”.
Pavarësisht vendimit të GJKKO-së, Ilir Meta ka reaguar përmes avokatit të tij dhe një postimi në rrjetet sociale, ku shprehet se nuk ka asnjë arsye ligjore për të vijuar qëndrimin në burg. Avokati Cakrani ka theksuar se beteja ligjore do të vijojë me një proces të zakonshëm gjyqësor, çka pritet të jetë një proces i gjatë dhe i ndërlikuar.