Zbardhet dëshmia para policisë e vajzës së re e cila ngriti në këmbë më 9 janar forcat policore pasi kërkoi ndihmë se ndihej e rrezikuar për jetën.
Gazetari Merin Maçi thotë se vajza ka qenë në gjendje të rënduar psikologjike dhe pas disa orësh nga shpëtimi i saj tek banesa në Astir i është marrë një dëshmi.
Ajo rrëfeu se mbrëmjen e 8 janarit ka qenë nën shoqërinë e 5 personave, 2 vajzave dhe 3 djemve. Vajzat, sipas gazetarit, janë shoqëruar nga policia, ndërsa po kërkohet të shoqërohen edhe djemtë.
21-vjeçarja është shprehur se ka qenë e rrezikuar pasi personat që kanë qenë me ta kanë qenë të armatosur.
“Ka rrëfyer se në banesë prej mbrëmjes së djeshme ka qenë nën shoqërinë e 5 personave të tjerë, dy vajzave dhe tre djemve. Nuk ka arritur t’i identifikojë të gjithë duke u shprehur se nuk i kujton personat në fjalë, vetëm dy vajzat ka identifikuar. Të paktën nga informacionet që unë kam ato pak minuta më parë janë shoqëruar nga policia, ndërkohë për tre djemtë është shprehur se mund t’i identifikojë në momentin që mund t’i shohë.
Ajo pretendon se nuk është dhunuar, por kujton se kanë qenë me armë personat në fjalë dhe ka qenë e rrezikuar gjatë gjithë kohës që qëndronte me ta. Këto deklarime janë vërtetuar edhe me verifikimet që janë bërë me pamjet filmike dhe personat janë identifikuar tashmë dhe po kërkohen për t’u shoqëruar”, u shpreh Maçi.
Gazetari tha se mbetet për t’u parë nëse ka qenë gjatë gjithë natës nën efektin e lëndëve narkotike apo është abuzuar me të.