Një skandal i ri ka shpërthyer, duke vënë në pikëpyetje integritetin e prokurimeve publike në Shqipëri. Pavarësisht dënimit me dy vite burg për shpërdorim detyre, ish-kryebashkiaku i Kukësit, Safet Gjici, ka fituar një tender me vlerë marramendëse prej mbi 2.3 MILIARD Lekë përmes një kompanie të lënë në emër të vëllait të tij, Lavdrim Gjici.
Tenderi, i fituar në bashkëpunim me Sadri Abazin dhe Ervin Tartarajn, ngre dyshime të forta për shkelje të ligjit të prokurimeve publike dhe favorizim. Raportohet se tre kompanitë janë shpallur fituese në shkelje të rregullave, duke skualifikuar të gjitha nëntë kompanitë e tjera pjesëmarrëse në garë. Kjo ngjarje vjen në 23 korrik, ndërkohë që Safet Gjici po vuan dënimin e tij për shpërdorim detyre, pas publikimit të një videoje ku ai shfaqej duke përdorur zyrën e bashkisë për shërbime të papërshtatshme me një grua.
Mungesë Transparence dhe Dyshime Për Favorizim
Ky rast shton akuzat se Gjici vazhdon të përfitojë kontrata publike duke përdorur rrjetet e tij të afërta dhe kompanitë e regjistruara në emër të familjarëve. Dyshohet se ky tender është favorizuar për grupin e “Rilindjes”, ku bëjnë pjesë Gjici, Abazi dhe Tartaraj.
Kontrata, e cila financohet nga buxheti i shtetit dhe ka të bëjë me një institucion strategjik siç është Spitali i Pogradecit, thekson edhe më shumë seriozitetin e situatës. Pavarësisht rëndësisë së projektit, procedura është shoqëruar me mungesë të theksuar transparence dhe eliminim të konkurrencës së ndershme, duke ngritur pyetje të mëdha mbi mënyrën se si administrohen fondet publike në vend.