Një person ka humbur jetën dhe pesë të tjerë kanë mbetur të plagosur nga aksidenti i rëndë i ndodhur sot në mëngjes në fshatin Dollc të Klinës, Kosovë. Viktima e kësaj tragjedie është 23-vjeçari Sadik Muslija, nga fshati Dujakë i Gjakovës, i cili ishte shofer i autoveturës së përfshirë në aksident.
Detaje të reja nga autoritetet
Zëdhënësi i prokurorisë në Pejë, Shkodran Nikçi, konfirmoi se trupi i Muslijës është dërguar për autopsi në Institutin e Mjekësisë Ligjore (IML) në Prishtinë. Sipas tij, ndërsa shoferi i makinës humbi jetën, disa pasagjerë të autobusit pësuan lëndime të lehta.
Spitali i Përgjithshëm i Pejës, gjithashtu, bëri të ditur se në urgjencë u sollën pesë persona të plagosur, të cilët po marrin trajtimin e nevojshëm mjekësor.
Grupi hetimor dhe prokurori i shtetit ndodhen në vendngjarje për të zbardhur plotësisht shkaqet dhe rrethanat e kësaj ngjarjeje tragjike.
