Një shtëpi dykatëshe në rrugën Shrewsbury Close, në zonën Bloxwich të Walsall, u përfshi nga flakët në orët e para të mëngjesit, duke lënë pas shkatërrim, panik dhe dy të rinj shqiptarë me djegie të rënda. Sipas autoriteteve britanike, banesa në fjalë dyshohet se ishte kthyer në një “shtëpi bari”, një laborator i paligjshëm për kultivimin e kanabisit me ndihmën e bombolave të gazit për ngrohje artificiale.
Zjarri, i cili dyshohet se shpërtheu si pasojë e një rrjedhjeje gazi, përfshiu me shpejtësi strukturën e ndërtesës dhe më pas kaloi në pronat fqinje. Si pasojë, dhjetëra banorë u evakuuan dhe u strehuan përkohësisht në Kishën e Shën Thomait, me ndihmën e Këshillit Bashkiak të Walsall.
Dy shqiptarët, të identifikuar si banorë të Tepelenës, janë filmuar duke ikur nga vendngjarja përmes një shtegu bari, ndërsa shtëpia digjej pas tyre. Më vonë, ata u gjetën nga ambulanca britanike në një adresë tjetër në Willenhall, rreth tre milje larg, me plagë të rënda nga djegiet. Njëri prej tyre kishte djegie në 30% të trupit, ndërsa tjetri është në gjendje kritike, me mbi 60% të trupit të djegur, i shtruar në Spitalin Queen Elizabeth të Birminghamit. Mjekët përdorën trajtim të avancuar traumash për të stabilizuar gjendjen e tyre.
Në terren u angazhuan mbi 60 zjarrfikës nga 10 njësi të ndryshme, të cilët punuan për orë të tëra për të shuar flakët dhe për të ndaluar përhapjen në lagje të tjera. Paralelisht, një ekip i përbashkët hetimor nga policia dhe shërbimi zjarrfikës ka nisur hetimet për shkaqet dhe rrethanat e zjarrit, me fokus të veçantë tek aktiviteti i dyshuar kriminal.
Policia e West Midlands konfirmoi hapjen e një hetimi të plotë penal, duke shqyrtuar pistën e kultivimit të paligjshëm të drogës dhe rrezikimin e jetës së banorëve. Sipas një banori lokal që përjetoi ngjarjen nga afër, flakët u përhapën në mënyrë të çuditshme:
“Ata dy djem dolën në rrugë – njëri me bluzë blu, tjetri me të bardhë. Pastaj shpërtheu zjarri. Në dhjetë minuta gjithçka mori flakë. Pjesa e sipërme e shtëpisë u shkatërrua plotësisht, ndërsa kati i poshtëm mbeti thuajse i paprekur. S’është normale kjo.”
Ky rast tronditës nënvizon edhe një herë rrezikun e madh që përfaqësojnë “shtëpitë e barit” në Britani – jo vetëm për personat që i menaxhojnë, por veçanërisht për komunitetin përreth, i cili rrezikon jetën dhe pronën si pasojë e aktiviteteve kriminale që zhvillohen në heshtje, brenda lagjeve të qeta.