Buenos Aires, Argjentinë – Departamenti i Shtetit të SHBA ka ndaluar hyrjen e ish-presidentes së Argjentinës, Cristina Fernández, duke e akuzuar atë për përfshirje në “korrupsion të rëndësishëm” gjatë kohës që ishte në detyrë.
Sipas një deklarate të Sekretarit të Shtetit, Marco Rubio, ndalimi i hyrjes në SHBA përfshin edhe ish-ministrin e Planifikimit, Julio Miguel De Vido, si dhe familjet e tyre.
“Fernández dhe De Vido kanë abuzuar me pushtetin e tyre duke orkestruar dhe përfituar financiarisht nga skema të shumta ryshfeti për kontrata të punëve publike, duke shkaktuar humbje prej miliona dollarësh për qeverinë e Argjentinës,” thuhet në deklaratën e Rubio-s, të publikuar të premten.
Ai theksoi se disa gjykata kanë dënuar ish-presidenten dhe ish-ministrin për korrupsion.
Cristina Fernández ka qenë një nga figurat më të rëndësishme politike në Argjentinë gjatë viteve të fundit.
Sipas Rubio-s, SHBA do të vazhdojë të promovojë llogaridhënien për ata që abuzojnë me pushtetin për përfitime personale.
Në nëntor të vitit të kaluar, një gjykatë në Argjentinë konfirmoi dënimin me gjashtë vjet burg dhe ndalimin e përjetshëm nga funksionet publike për Fernández. Ajo ishte dënuar fillimisht në vitin 2022 për një skemë mashtrimi që kishte përvetësuar miliona dollarë përmes projekteve të punëve publike gjatë presidencës së saj.
Pavarësisht vendimit, Fernández ka mohuar të gjitha akuzat dhe aktualisht nuk ndodhet në burg.