Këto janë pamjet e regjistruara nga kamerat e sigurisë në Kopshtin e fëmijëve në Astir, ku një edukatore qëllon me shuplakë një djalë të mitur.
Edukatorja e identifikuar si R.G., 46-vjeçare është shpallur në kërkim policor për keqtrajtim të fëmijës gjatë qëndrimit në kopsht.
Babai i të mituri ka denoncuar në komisariatin nr.6 në Tiranë se djali i tij është keqtrajtuar në kopësht prej saj. Fillimisht është ankuar te pronari i kopshtit, i cili pasi mësoi ngjarjen e ka pushuar menjëherë edukatoren nga puna. Pas denoncimit 46-vjeçarja nuk është gjetur në shtëpi dhe po punohet për ta lokalizuar për sqarimin e ngjarjes.
“Specialistët për Hetimin e Krimeve të Komisariatit të Policisë Nr. 6 referuan materialet në Prokurori dhe po punojnë për kapjen e shtetases R. G., 46 vjeçe, pasi ka kallëzuar një shtetas, se shtetasja R. G. ka keqtrajtuar djalin e tij të mitur, në kopshtin ku ajo punon si edukatore”, informoi policia e Tiranës.