Strategu amerikan Chris LaCivita ka reaguar pas sulmeve publike të Kryeministrit Edi Rama ndaj tij, vetëm pak ditë përpara zgjedhjeve në Shqipëri. Në një prononcim për gazetarin Çim Peka, LaCivita u shpreh se nuk e kishte menduar kurrë që do të bëhej objektiv i sulmeve të një kryeministri të huaj, aq më tepër kur vetë nuk është as kandidat, as deputet dhe nuk garon për asnjë post në Shqipëri.
“LaCivita nuk është në listat zgjedhore, nuk është pjesë e fushatës si kandidat, por pavarësisht kësaj, është sulmuar në mënyrë të përsëritur nga kryeministri shqiptar. Kjo, sipas tij, tregon qartë nivelin e dëshpërimit që ka kapur Edi Ramën, i cili – siç thotë LaCivita – po përpiqet me çdo kusht të devijojë vëmendjen e publikut nga çështjet reale që përballen qytetarët.”
“Më bën për të qeshur, sepse nuk kam asnjë rol elektoral. Rama është i dëshpëruar dhe përpiqet të ndryshojë temën e debatit, sepse nuk do të flasë për 12 vitet e dështimeve të tij”, thekson strategu amerikan, duke shtuar se sulmet ndaj tij janë në fakt sulme ndaj gjithë atyre që kanë kontribuar për një proces të drejtë dhe të barabartë zgjedhor.
LaCivita pranon se e ka pritur me surprizë këtë reagim agresiv nga Edi Rama, por sipas tij, ky është një tregues i qartë i destabilitetit të kryeministrit dhe i frikës së humbjes. “Ne duam të flasim për çfarë ka ndodhur në këto 12 vite. Ai s’do. Ai zgjedh të sulmojë mua, por unë jam vetëm një nga shumë njerëz që punojnë për të mbështetur një alternativë ndryshe. Ai është thjesht i paqëndrueshëm”, u shpreh ai.
Ky reagim vjen në një moment tensioni të lartë politik në vend, ku Rama është përballur me një valë kritikash, sidomos pas zhvillimeve të fundit në SHBA, që hodhën hije mbi vendimin e mëparshëm për shpalljen “non grata” të liderit opozitar Sali Berisha – një tjetër element që ka shtuar dyshimet për qëndrueshmërinë politike të mazhorancës aktuale.