Një studim i ri nga studiuesit në Media Lab të MIT (Institutit të Teknologjisë në Masaçusets) ka ngritur shqetësime serioze në lidhje me ndikimin e mundshëm të inteligjencës artificiale si ChatGPT në aftësitë e të menduarit kritik, veçanërisht tek përdoruesit më të rinj.
Studimi, i cili përfshiu 54 subjekte të moshës 18 deri në 39 vjeç nga zona e Bostonit, i ndau pjesëmarrësit në tre grupe. Çdo grupi iu kërkua të shkruante disa ese të standardizuara SAT duke përdorur mjete të ndryshme: grupi i parë përdori ChatGPT të OpenAI, grupi i dytë përdori motorin e kërkimit të Google, ndërsa grupi i tretë nuk përdori asnjë ndihmë. Studiuesit përdorën një elektroencefalogramë (EEG) për të regjistruar aktivitetin e trurit të shkrimtarëve në 32 rajone të ndryshme.
Gjetjet e studimit zbuluan se nga të tre grupet, përdoruesit e ChatGPT shfaqën angazhimin më të ulët të aktivitetit të trurit dhe “vazhdimisht performuan dobët në nivele nervore, gjuhësore dhe sjelljeje”. Gjatë disa muajve të studimit, u vu re se përdoruesit e ChatGPT u bënë gjithnjë e më dembelë me çdo ese të mëvonshme, duke u mbështetur shpesh në kopjimin dhe ngjitjen e teksteve deri në përfundim të studimit.
Autorët e studimit sugjerojnë se përdorimi i shpeshtë i ChatGPT mund të ketë një ndikim negativ në procesin e të nxënit, veçanërisht për përdoruesit më të rinj, truri i të cilëve është ende në zhvillim.
Autorja kryesore e punimit, Nataliya Kosmyna, shprehu se e ka konsideruar të rëndësishme publikimin e gjetjeve të studimit sa më shpejt të jetë e mundur, për të ngritur shqetësimet në lidhje me faktin se ndërsa shoqëria mbështetet gjithnjë e më shumë tek ChatGPT për lehtësi të menjëhershme, zhvillimi afatgjatë i trurit mund të sakrifikohet në këtë proces.
“Ajo që më motivoi vërtet ta publikoj tani para se të pres për një rishikim të plotë nga kolegët është se kam frikë se pas 6-8 muajsh, do të ketë ndonjë politikëbërës që do të vendosë, ‘le të bëjmë kopshtin GPT’. Mendoj se kjo do të ishte absolutisht e keqe dhe e dëmshme,” tha Kosmyna, duke theksuar rrezikun e madh që paraqet kjo për trurin në zhvillim të fëmijëve dhe adoleshentëve. Ajo bëri thirrje për një qasje të kujdesshme ndaj integrimit të teknologjive të tilla në mjediset arsimore.