Një aksident i rëndë dhe tronditës ka ndodhur këtë të martë, pak pas mesditës, pranë zonës së Kishës së Laçit – një vend i frekuentuar nga pelegrinë në këtë periudhë të vitit. Një automjet tip “Benz”, i drejtuar nga një grua, ka humbur kontrollin dhe ka përplasur disa persona që ndodheshin në vend, duke i marrë përpara me makinë.
Sipas informacioneve paraprake nga vendngjarja, disa qytetarë kanë pësuar lëndime fizike, ndërsa një vajzë raportohet të jetë dëmtuar më rëndë dhe është transportuar me urgjencë drejt spitalit për ndihmë mjekësore të specializuar. Mësohet se ajo ka pësuar dëmtime serioze në këmbën e djathtë, me dyshime për shtypje të kockës.
Ngjarja ka shkaktuar panik mes besimtarëve dhe qytetarëve të pranishëm në ambientet përreth Kishës, një vend që zakonisht karakterizohet nga paqja dhe lutja, por që sot u kthye në skenën e një incidenti të dhimbshëm.
Një qytetare, dëshmitare e drejtpërdrejtë e ngjarjes, ka dhënë një rrëfim të detajuar për momentet dramatike që ndodhën në vendin e shenjtë. Ajo thekson se shoferja nuk ka vepruar me dashje dhe se mund të jetë një person me aftësi të kufizuara. Sipas dëshmisë së saj, në një moment konfuzioni, në vend që të shkelte frenat, ajo i ka dhënë më shumë gaz automjetit, duke humbur kontrollin dhe duke u përplasur me grupin e njerëzve që ndodheshin në rrugë.
“Mori përpara një zonjë me makinë njerëzit tek Kisha e Laçit. Një vajzë me dëmtime në këmbë është nisur menjëherë për në spital. Nuk pashë shumë se shkova te ndihmoja vajzën. Përplasi disa njerëz, po më rëndë ishte një vajzë tek këmba e djathtë, kishte shtypje kocke. Ambulanca erdhi me shpejtësi. Ajo (shoferja) nuk donte ta bënte këtë, por i dha gaz makinës në vend që ta ndalte. Mesa kuptova, nuk ishte me qëllim. E kishte gabim, po kur donte ta ndalonte, i dha gaz shumë dhe ndodhi kjo,” tregoi e tronditur dëshmitarja.
Policia dhe shërbimet emergjente kanë mbërritur menjëherë në vendngjarje, duke bërë të mundur evakuimin e të lënduarve dhe nisjen e hetimeve për zbardhjen e plotë të rrethanave. Burime zyrtare bëjnë me dije se është shoqëruar drejt komisariatit edhe drejtuesja e mjetit, ndërsa do t’i nënshtrohet ekspertizës mjekësore për të kuptuar më shumë rreth gjendjes së saj fizike dhe mendore.
Ngjarja ka shkaktuar jo vetëm lëndime fizike, por edhe tronditje të thellë emocionale mes qytetarëve që kishin shkuar për pelegrinazh. Hetimet janë në vijim dhe pritet një njoftim më i detajuar nga autoritetet.