Zbardhet lëvizja e radhës së Erion Veliajt — kërkon të jetë prezent në Gjykatën Kushtetuese për padinë ndaj shkarkimit nga Rama dhe dekretit të Begajt (31 tetor)
Me datë 31 tetor 2025, në Gjykatën Kushtetuese do të zhvillohet seanca vendimtare për padinë e Erion Veliajt, i cili ka kundërshtuar shkarkimin nga kryeministri Edi Rama si dhe dekretin e Presidentit Bajram Begaj, i cili ndërkohë është pezulluar përkohësisht nga kjo gjykatë.
Burime pranë Kushtetueses konfirmojnë se Veliaj ka kërkuar të jetë personalisht prezent në sallën e gjyqit, pasi seanca do të jetë publike dhe e hapur për mediat.
Megjithatë, prezenca e tij nuk është automatike, pasi ndodhet në paraburgim dhe për këtë kërkohet miratimi zyrtar i Drejtorisë së Përgjithshme të Burgjeve, e cila e jep lejen vetëm pasi merr një autorizim me shkrim nga SPAK.
Sipas burimeve, Gjykata Kushtetuese ka dërguar tashmë shkresën zyrtare për lejimin e paditësit Erion Veliaj që të marrë pjesë në seancën e 31 tetorit.
Ky pritet të jetë një nga proceset më të bujshme të vitit, që mund të përcaktojë jo vetëm fatin politik të ish-kryebashkiakut të Tiranës, por edhe të krijojë një precedent të ri në raportet mes ekzekutivit dhe pushtetit vendor.