Një tjetër goditje e rëndë për lirinë e shtypit në Meksikë. Gazetari i njohur investigativ Miguel Ángel Beltrán, i cili kishte dokumentuar me guxim aktivitetet e karteleve të drogës, është gjetur i vrarë brutalisht në një autostradë, me një shënim kërcënues pranë trupit të tij.
Sipas mediave lokale, trupi i Beltrán u identifikua nga djali i tij, i cili kishte qenë personi i fundit që e kishte parë gjallë, teksa gazetari ishte nisur për në punë. Në shënimin e lënë pranë trupit shkruhej: “Për përhapjen e akuzave të rreme kundër popullit të Durangos.” Këto mesazhe, të njohura ndryshe si “narcomensajes”, përdoren shpesh nga kartelet si paralajmërime makabre për këdo që guxon të raportojë mbi aktivitetin e tyre kriminal.
Beltrán ishte një figurë e njohur në fushën e gazetarisë investigative në Meksikë. Ai kishte punuar për disa media rajonale dhe drejtonte gjithashtu një blog dhe një kanal në TikTok, ku publikonte materiale rreth krimit të organizuar, korrupsionit dhe ngjarjeve të përditshme. Vetëm disa ditë para se të vritej, ai kishte postuar një video mbi arrestimin e një të dyshuari si udhëheqës bande në Durango, çka ngre dyshime se raportimi i tij mund të ketë qenë motiv për eliminimin e tij.
Organizata Reporterë pa Kufij (RSF) konfirmoi se Beltrán është gazetari i nëntë i vrarë në Meksikë gjatë vitit 2025, duke e renditur vendin si njërin ndër më të rrezikshmit në botë për profesionistët e medias. Vetëm gjatë dekadës së fundit, dhjetëra gazetarë janë vrarë për shkak të punës së tyre, ndërsa shumica e rasteve mbeten pa u hetuar.
Ndërkohë, Shoqata Ndëramerikane e Shtypit (SIP) dënoi ashpër vrasjen, duke i kërkuar autoriteteve meksikane të zbardhin urgjentisht rastin dhe të ndëshkojnë autorët. “Vrasja e një gazetari është një goditje ndaj të gjithë shoqërisë. Heshtja përballë këtij krimi do të thotë bashkëfajësi,” thuhet në deklaratën e saj zyrtare.
Rasti i Beltrán ka shkaktuar tronditje të thellë në radhët e komunitetit mediatik në Meksikë dhe ka ringjallur debatet për mungesën e mbrojtjes shtetërore ndaj gazetarëve, të cilët shpesh punojnë nën kërcënimin e grupeve kriminale dhe pa garanci sigurie nga institucionet.
