Një ngjarje e rëndë dhe e mbuluar nga misteri ka tronditur komunitetin shqiptar në Itali. Fatos Cenaj, ish-oficer i policisë së burgjeve në Shqipëri, ndërroi jetë sot, më 11 qershor, pas tre ditësh në gjendje kritike për jetën. Ai ishte gjetur i plagosur rëndë në rrugë ditën e diel, më 8 qershor, me një plagë plumbi në zonën e veshit.
Pavarësisht përpjekjeve të mjekëve, 59-vjeçari nuk arriti t’i mbijetonte dëmtimit të rëndë. Vdekja e tij mbetet e rrethuar nga pikëpyetje, pasi autoritetet italiane ende nuk kanë mundur të japin një shpjegim të qartë për rrethanat e incidentit.
Fatos Cenaj kishte emigruar në Itali rreth tre vjet më parë, pasi ishte larguar nga Shqipëria dhe kishte përfunduar shërbimin e tij si roje burgu. Ai ishte vendosur në komunën Fontaniva, në provincën e Padovës, ku kishte ndërtuar një jetë të qetë dhe të thjeshtë.
Sipas burimeve nga karabinierët italianë, hetimet për rastin kanë qenë të gjera, por deri tani nuk është gjetur asnjë motiv që të shpjegojë pse Cenaj u qëllua. Në jetën e tij private dhe profesionale, ish-polici nuk kishte pasur probleme apo konflikte të njohura.
Në karrierën e tij si oficer i policisë së burgjeve në Shqipëri, Fatos Cenaj kishte mbajtur një profil të ulët dhe nuk ishte përfshirë kurrë në ngjarje të bujshme apo në ndonjë hetim. Shërbimi i tij ishte kryesisht administrativ, duke kaluar pjesën më të madhe të orëve të punës pas një tavoline, larg kontakteve të drejtpërdrejta me të burgosurit.
As në Shqipëri, as në Itali, emri i tij nuk ishte shfaqur ndonjëherë në dosje hetimore, çka e bën edhe më të vështirë për hetuesit italianë të ndërtojnë një pistë të qartë për motivin e mundshëm të ngjarjes.
Për momentin, hipoteza më e fortë mbi të cilën po punojnë karabinierët është ajo e një plumbi qorr, që mund të ketë dalë nga ndonjë armë e qëlluar në zonë për motive të tjera, dhe që ka kapur rastësisht 59-vjeçarin, i cili gjendej në rrugë në momentin fatkeq.
Deri tani, asnjë person nuk është identifikuar apo vënë nën hetim lidhur me rastin, ndërkohë që autoritetet kanë vijuar me verifikime të imta në zonën ku ndodhi ngjarja, për të kuptuar nëse mund të gjenden gjurmë ose dëshmi që të ndihmojnë në zbardhjen e plotë të saj.
Ngjarja ka lënë të tronditur jo vetëm komunitetin shqiptar në Itali, por edhe ish-kolegët dhe miqtë e Fatos Cenajt në Shqipëri, të cilët e kanë njohur atë si një njeri të qetë, të përkushtuar në punë dhe larg çdo lloj konflikti.
Për momentin, misteri rreth kësaj vdekjeje mbetet i hapur, ndërsa hetuesit italianë premtojnë se do të vijojnë punën me intensitet deri në zbardhjen e plotë të ngjarjes.