Me përfshirjen e Xhenetës si pjesë e panelit në emisionin “Trotuar”, në kuadër të programit “E Diell” në Top Channel, një takim mes tyre ishte pothuajse i pashmangshëm, duke qenë se të dy tashmë frekuentojnë të njëjtat ambiente televizive. Dhe siç pritej, që në javën e parë pas finales së BBV, ata janë ndeshur për herë të parë ballë për ballë.
Në episodin e sotëm të “Trotuar”, tema e takimit mes Xhenetës dhe Gjestit nuk iu shpëtoi diskutimeve të panelit. Të ftuarit, me batuta dhe ngacmime të vogla, nuk e kursyen Xhenetën, duke përmendur takimin e saj me Gjestin dhe madje duke nënvizuar një detaj të veçantë: një shkëmbim buzëqeshjesh mes tyre.
E pyetur nga moderatorja Nevina Shtylla mbi këtë moment, Xheneta vendosi të bëjë një sqarim publik. Ajo theksoi se pavarësisht takimit fizikisht në ambientet e televizionit, nuk ka pasur asnjë bisedë mes saj dhe Gjestit. Sipas saj, Gjest ishte i shoqëruar në atë moment dhe nuk kishte vend për ndonjë ndërveprim tjetër përveç një buzëqeshjeje të thjeshtë e spontane.
Megjithatë, kur Nevina i drejtoi pyetjen direkte: “Nëse Gesti do të të përshëndeste, do t’i ktheje përshëndetjen?”, përgjigja e Xhenetës ishte kategorike:
“Jo, nuk do të flisja.”
Xheneta theksoi gjithashtu se kjo është një zgjedhje plotësisht personale, e diktuar nga ndjenjat dhe bindjet e saj, dhe nuk ka të bëjë aspak me ndonjë kontratë apo ndonjë ndikim të jashtëm, qoftë edhe nga menaxheri i saj:
“Menaxheri im nuk ndërhyn në asnjë vendim timin,” – u shpreh ajo prerazi, duke lënë të kuptohet qartë se gjithçka që lidhet me marrëdhënien me Gjestin është përfundimisht një kapitull i mbyllur për të.
Ky moment në “Trotuar” jo vetëm që konfirmoi distancën që Xheneta dëshiron të ruajë, por tregoi edhe një maturi të qartë në mënyrën se si ajo po menaxhon situatat e vështira pas përfundimit të spektaklit.