Kujtim Cakrani, avokati i Ilir Metës, në një lidhje direkte me studion e “Breaking” nga Xhoi Malësia, në Top News, tregoi se si po e përballon ish-Presidenti kohën në burg, gati një vit pas arrestimit.
Avokati i Metës është shprehur se libri që do publikojë ish-presidenti do të trondisë politikën shqiptare. “Është duke shkruar edhe një libër mbi angazhimet e tij gjatë 35 viteve të fundit.
Do të jetë një libër që do i zbulojë shqiptarëve se çfarë ka ndodhur pas kuintave në politikën shqiptare dhe do ta trondisë atë. Meta po hedh kujtimet e veta, veprimtarinë e tij politik në një libër. Zoti Meta do jetë Konti MonteKristo i politikës shqiptare”, shtoi avokati.
Kujtojmë se Ilir Meta ndodhet i arrestuar që prej 21 tetorit 2024. SPAK mbylli hetimet për dosjen ‘Meta’ më 28 korrik, ndërsa e kaloi për gjykim në fund të gushtit, e cila përfshiu tre hetime në një; aferën CEZ-DIA, lobimin e LSI në SHBA dhe hetimin pasuror.
Meta dhe Kryemadhi akuzohen për korrupsion pasiv, pastrim parash dhe mosdeklarim pasurie. Pirro Xhixho akuzohet për korrupsion pasiv të funksionarëve të lartë të kryer në bashkëpunim.
Ndërsa Fatime Kryemadhi akuzohet për pastrim parash, së bashku me Ema Çokun.