Një lajm i trishtë ka prekur sot deputetin e Partisë Demokratike, Asllan Dogjani, i cili ka ndarë publikisht dhimbjen për ndarjen nga jeta të një të afërmi shumë të dashur për të. Bëhet fjalë për djalin e dajës së tij, Artanin, të cilin Dogjani e konsideronte më shumë se një kushëri – një vëlla të vërtetë.
Përmes një postimi emocional në rrjetin social “Facebook”, Dogjani ka ndarë një fotografi të të ndjerit dhe një mesazh prekës që pasqyron dhimbjen, mallin dhe dashurinë e madhe që kishte për të. Humbja e Artanit, në një moshë të re dhe në mënyrë të parakohshme, ka lënë një boshllëk të thellë në zemrën e tij dhe të familjes.
“Lamtumirë, Artan…
Është e vështirë të gjej fjalë për të përshkruar dhimbjen që ndjej sot. Humbja jote, Artan, ka lënë një plagë të thellë në zemrën time dhe të familjes sonë. Ishte shumë herët, shumë padrejtësisht…”, shkruan Dogjani në statusin e tij, duke e cilësuar Artanin si një njeri të rrallë – të dashur, të qetë, me zemër të bardhë dhe shpirt të pastër.
Ai thekson se Artani nuk ishte thjesht pjesë e gjakut, por pjesë e shpirtit të tij, një njeri që ka lënë gjurmë me ngrohtësinë, buzëqeshjen dhe fjalën e ëmbël që e karakterizonte.
“Prania jote e ngrohtë dhe fjala jote e ëmbël do të më mungojnë pafund. Qofsh i xhehnetit, Artan. Kujtimi yt do të jetojë gjithmonë në zemrat tona”, përfundon Dogjani në një mesazh ku dhimbja dhe dashuria janë të ndërthurura në mënyrë të ndjerë.
Deputeti u ka shprehur ngushëllimet e tij më të sinqerta familjarëve, të afërmve dhe të gjithë atyre që e kanë njohur Artanin dhe që, siç thotë ai, “kanë qenë të bekuar ta kenë në jetën e tyre, sado për pak”.
Një mesazh që tejkalon kufijtë e politikës dhe na kujton se në fund të ditës, jemi të gjithë njerëz, të bashkuar nga dhimbja, kujtimi dhe dashuria për ata që nuk janë më.