Në seancën gjyqësore të së hënës në rastin e vrasjes së Liridona Ademajt, i akuzuari kryesor, Naim Murseli, ka marrë në pyetje vëllain e të ndjerës, Leonard Ademaj, i cili po dëshmon në gjykatë.
Gjatë marrjes në pyetje, Murseli e ka pyetur Leonard Ademajn nëse motra e tij ishte ankuar ndonjëherë gjatë 12 viteve të martesës së saj me të. Sipas raportimeve të Insajderit, Ademaj u përgjigj duke thënë se Liridona nuk ishte ankuar, përveç faktit se disa muaj para se të ndodhte tragjedia, familja e tyre kishte marrë vesh për një aferë tradhtie nga ana e Naim Murselit me një të afërme të tyre.
Murseli ka pyetur gjithashtu Leonard Ademajn në çfarë ore kishte qenë në morg së bashku me të akuzuarin tjetër, Kushtrim Kokalla. Megjithatë, Ademaj është përgjigjur se nuk e mbante mend orën e saktë.
Gjatë dëshmisë së tij, Leonard Ademaj ka shtuar se pas vrasjes së Liridonës, familja e tyre nuk është kontaktuar nga Naim Murseli për të pyetur në lidhje me mirëqenien e fëmijëve. “Nga momenti që kemi marrë fëmijët, e deri të nesërmen asnjëherë Naimi nuk ka pyetur për fëmijët dhe as nuk ka thirrë. Fëmijët nuk donin assesi të shkonin me të kur ka ardhë me i marrë por i kemi mashtruar disi për të shkuar me të“, ka deklaruar Ademaj.
Dëshmia e Leonard Ademajt vazhdon të hedhë dritë mbi marrëdhëniet brenda familjes para dhe pas vrasjes së Liridona Ademajt, ndërsa procesi gjyqësor vijon me seanca të tjera dëgjimore.