Salla e Gjykatës së Posaçme është shndërruar sot në arenë tensioni gjatë seancës gjyqësore ku ish-prokurori Arjan Ndoja, aktualisht deputet i zgjedhur i Partisë Demokratike në qarkun e Durrësit, është përballur me Plarent Dervishajn, i akuzuar për atentatin ndaj tij, i cili ndodhi disa vite më parë.
Momente të nxehta kanë shoqëruar pyetjet e drejtpërdrejta të Dervishajt ndaj Ndojës. I akuzuari e ka pyetur Ndojën nëse ai kishte ndonjë informacion që sugjeronte se Dervishaj ishte porositësi i atentatit ndaj ti.
Ndërkohë, Arjan Ndoja iu përgjigj Dervishajt duke e shikuar drejt në sy, në një përpjekje për të zbuluar të vërtetën, dhe me një ton ironik shtoi fjalët “je trim i madh ti”.
Nga ana tjetër, Plarent Dervishaj i është drejtuar Ndojës duke i thënë se nëse ai do të kishte menduar se Ndoja kishte gisht në atentatin ndaj tij, i cili kishte ndodhur rreth katër muaj para atentatit ndaj ish-prokurorit, ai nuk do ta kishte falur deputetin e zgjedhur të PD-së.
Kujtojmë se më herët, Arjan Ndoja kishte deklaruar se para se të ndodhte atentati ndaj tij, ai kishte pasur shqetësime vetëm nga deklaratat publike të Kryeministrit Edi Rama dhe ish-Zëvendëskryeministrit Erion Braçe.
Dialogu i plotë mes Plarent Dervishajt dhe Arjan Ndojës në sallën e gjyqit:
Dervishi: I vetmi konflikt që ti ke pasur thua që ka qenë ai me kryeministrin dhe ish zv. Kryeministrin, Erjon Braçe. Sipas teje, nuk ka arsye, nuk njihemi, nuk kemi konflikte. A ke informacione ti, që unë kam dhënë porosinë për të të vrarë? Mos e kam marrë porosinë nga Erjon Braçe?
Ndoja: Kam dëgjuar shumë për ty, edhe nga shtypi. Por këto të dëgjuarat i marr me rezerva. Unë po të shoh në sy.
Plarent Dervishaj: Në sy të shoh dhe unë.
Ndoja: E shoh, je trim ti.
Plarent Dervishaj: Ti kujton se po të kesh gisht ti tek atentati im, do të ta fal?
Ndoja: Cilin atentat?
Plarent Dervishaj: Atentatin tim, ka ndodhur nja 4 muaj para teje.
Ndoja: Unë kam ardhur për atentatin tim, jo tëndin.
Ky konfrontim verbal mes ish-prokurorit dhe të akuzuarit ka ndezur atmosferën në sallën e gjyqit dhe pritet të ketë zhvillime të tjera në vijim të procesit gjyqësor.