Spektakli më jetëgjatë i humorit shqiptar, “Portokalli”, ka çelur zyrtarisht sezonin e tij të 42-të, duke shënuar një tjetër faqe në historinë e mbi 20 viteve transmetim të pandërprerë që e kanë kthyer në një emblemë të të dielave shqiptare.
Me një kombinim të aktorëve të njohur që kanë mbajtur gjallë suksesin ndër vite dhe fytyra të reja plot energji, ky sezon premton humor të freskët, personazhe të rinj, situata absurde, satire sociale dhe histori që do të futen në çdo familje shqiptare, brenda dhe jashtë kufijve.
Bes Kallaku rikthehet aty ku gjithçka nisi
Një nga momentet më të shumëpritura të episodit të parë është rikthimi i Bes Kallakut, aktorit të dashur që ka lënë gjurmë të thella në skenën e “Portokallisë”.
I ftuar si personazh special, Besi do të rikthejë për një natë emocionet, humorin dhe nostalgjinë që e kanë shoqëruar që nga hapat e tij të parë në këtë skenë. Publiku e ka kërkuar prej kohësh rikthimin e tij, dhe këtë javë, dëshira e tyre do të realizohet.
“Portokalli” vjen si gjithmonë në ekranin e Top Channel, çdo të diel, duke sjellë një spektakël që ndërthur të qeshurën, reflektimin dhe ironinë, në një format që vazhdon të evoluojë pa e humbur ADN-në e vet të pazëvendësueshme.