Deputeti i Partisë Demokratike, Bardh Spahia, ndodhet i shtruar në spital pas një aksidenti të pazakontë. Ai ka pësuar një frakturë në kavilje teksa luante futboll me djalin dhe nipat e tij. Lajmin e ka bërë të ditur vetë deputeti përmes një postimi në rrjetet sociale, duke treguar se do t’i duhet të kalojë disa javë jashtë fushës, ose siç e ka quajtur ai, “në stol”.
Spahia e ka përshkruar ngjarjen si një moment entuziazmi dhe energjie, por që përfundoi me një dëmtim serioz. “Nuk i rezistova dot sfidës për një ndeshje futbolli me djalin dhe nipat,” shkruan ai, duke shtuar se si pasojë e lojës fitoi “trofeun” e një frakture dhe një këmbe në allçi.
Me humor, Spahia theksoi se më e rëndësishmja ka kaluar, duke lënë të kuptohet se dëmtimi nuk është serioz sa për të rrezikuar jetën, por do të kërkojë kohë rikuperimi. Ai shtoi se do ta shfrytëzojë këtë kohë për të shijuar momente me familjen e tij, duke e cilësuar veten “kapiten jashtë fushe”.
Ky lajm vjen në një kohë kur deputetët përgatiten për nisjen e legjislaturës së re parlamentare. Siç e ka theksuar edhe vetë Spahia, rikthimi i tij në seancat parlamentare do të jetë me paterica, duke shërbyer si një kujtesë jo e zakonshme e pasioneve të tij jashtë politikës.