Autoritetet shëndetësore në Spanjë kanë konfirmuar një rast të infektimit me ethen hemorragjike Krime-Kongo (CCHF), një virus i rrallë por vdekjeprurës, i cili ka një normë vdekshmërie deri në 40%.
Rasti është identifikuar më 28 maj në qytetin Salamanca, pas një pickimi nga rriqra. Lajmi ka alarmuar veçanërisht turistët britanikë, të cilët udhëtojnë shpesh drejt këtij destinacioni.
Institucionet britanike të shëndetit publik kanë paralajmëruar qytetarët që planifikojnë të udhëtojnë drejt Spanjës të marrin masa paraprake për të shmangur kontaktin me rriqrat dhe me persona të infektuar.
“Nuk ka vaksinë apo trajtim specifik për CCHF. Udhëtarët duhet të shmangin pickimet e rriqrave dhe kontaktin me lëngje trupore të njerëzve ose kafshëve të sëmura”, theksohet në njoftim.
Simptomat e CCHF variojnë nga forma të lehta si temperaturë, dhimbje koke, diarre, të vjella, skuqje të syve dhe konfuzion, deri në forma të rënda si hemorragji, dëmtim të organeve të brendshme dhe shok. Periudha e inkubacionit mund të zgjasë deri në 14 ditë, por zakonisht është 3–7 ditë.
Ekspertët këshillojnë që çdo person që kthehet në Mbretërinë e Bashkuar nga një zonë e rrezikuar dhe shfaq simptoma, të kontaktojë menjëherë mjekun e familjes ose shërbimin NHS 111, duke përmendur vendet ku ka udhëtuar.