Qeveria e Edi Ramës ia doli sërish të kalojë disa projektligje të rëndësishme në Kuvend, por jo falë shumicës socialiste, e cila nuk arriti të sigurojë vetë kuorumin minimal prej 71 votash. Vendimet u miratuan me ndihmën e votave të PSD-së dhe një votë vendimtare nga deputeti i PDIU-së, Nusret Avdulla – një zhvillim që ekspozon paradoksin e radhës në skenën politike shqiptare: Partia për Drejtësi, Integrim dhe Unitet, e cila tashmë është aleate me opozitën e Berishës, i dha Ramës mbështetjen që i mungonte.
Ironikisht, PDIU jo vetëm që është distancuar nga mazhoranca, por së fundmi ka hyrë në marrëveshje me Partinë Demokratike, duke siguruar edhe përfaqësim në listat e sigurta të kësaj force politike në zgjedhjet e fundit. Megjithatë, kjo nuk e pengoi që të shërbejë si “shpëtimtar” për shumicën e brishtë të PS-së në Kuvend.
Në seancën e tensionuar parlamentare, ku opozita refuzoi të marrë pjesë në votim, PS kishte në sallë vetëm 68 deputetë. Me mungesa si Edi Rama, Mirela Kumbaro, Bledi Çuçi, Sajmir Hasalla dhe Tatjana Piro, mazhoranca nuk arrinte dot kuorumin e nevojshëm. Kryeparlamentarja Elisa Spiropali, disa herë gjatë votimit, deklaroi me zë: “Duhet edhe një votë”.
Pikërisht atë votë e siguruan përfaqësues të partive të vogla jashtë PS-së: Gledis Çeliku dhe Gertjan Deda të PSD-së, si dhe Nusret Avdulla i PDIU-së. Të tre votuan pro të gjitha aktet në rendin e ditës, duke i hapur rrugën miratimit të një sërë ligjesh dhe marrëveshjesh ndërkombëtare, nga buxheti i shtetit te marrëveshjet me BE-në dhe Abu Dhabin.
Kjo situatë ekspozon edhe njëherë karakterin oportunist dhe të lëvizshëm të aleancave politike në Shqipëri, ku interesat momentale mbizotërojnë mbi deklaratat publike dhe qëndrimet ideologjike. Mjaft të kujtojmë se pak javë më parë, përpara zgjedhjeve të 11 majit, Rama dhe Tom Doshi shkëmbenin akuza të forta publike, për t’u rikthyer sot në “qetësinë dhe dashurinë” që e karakterizon marrëdhënien e tyre në momente krize numerike për qeverinë.
Ky bashkëpunim i heshtur nuk është pa precedent. Doshi, që shpesh është kritikuar si tregtar votash në Kuvend, po ruan qetësinë, me shpresën se do të jetë sërish faktor në rastet kur PS-së t’i duhen 84 vota për ligje me shumicë të cilësuar.
Ndërkohë, opozita ndjek zhvillimet nga tribuna e mos-pjesëmarrjes, ndërsa aleatët e saj në letër (si PDIU) vazhdojnë të luajnë me dy porta.
Në fund, të gjitha aktet e propozuara u miratuan me 71 vota pro, pa asnjë kundër apo abstenim – një miratim aritmetik, i mundësuar jo nga një shumicë e qëndrueshme, por nga lëvizjet pragmatike të partive satelit që nuk mbajnë më anë, por vetëm llogari.