Ditën e sotme kanë dalë para Gjykatës së Tiranës për rivlerësimin e masave të sigurisë tre të arrestuar, për aksidentin e regjistruar mbrëmjen e të mërkurës në aksin Vorë-Fushë Krujë, ku humbën jetën 4 të rinj.
Gjykata ka lënë në burg shoferin e betonieres, 24-vjeçarin Aleksandër Krrashi. Ai i ishte i pajisur me leje drejtimi, por jo për mjetet e rënda, teksa në momentin e aksidentit, kishte ndaluar në karrexhatë betonieren, por nuk kishte ndezur bllokazhin.
Mbi të rëndojnë akuzat për veprat penale “Shkelja e rregullave të qarkullimit rrugor”, “Drejtimi i automjetit në mënyrë të parregullt” dhe “Largimi nga vendi i aksidentit”.
Në dëshminë e dhënë para togave të zeza, i riu ka deklaruar se në momentin e aksidentit ndodhej në betoniere, ku ka tentuar të hapë derën e automjetit të viktimiva, por ka qenë e pamundur. Po ashtu, ai thotë se ka njoftuar edhe kompanionë, si dhe familjarët.
“Iu shpreh ngushëllime të sinqerta familjeve të viktimave. Kur makina më goditi nga pas, dola menjëherë dhe tentova të hap dyert. Makina shpërtheu në flakë dhe ishte e pamundur ta ndihmoja më tej. Mora kontakt me kompaninë dhe kërkova që të sillnin një betoniere me ujë për të shuar flakët. E njoftova dhe familjen time dhe më pas shkova në shtëpi. Pas ndërrimit të rrobave, bashkë me katër familjarë të mi, shkova në Komisariatin e Kamzës ku dhe u dorëzova.”, u shpreh Aleksandër Krrashi. Mësohet se i riu ka plagë djegieje në fytyrë.
Gjithashtu, gjykata ka lënë në burg edhe kushëririn e shoferit të betonieres, shtetasin Valentin Krrashi, 25 vjeç, i cili dyshohet se e ka larguar 24-vjeçarin me automjet nga vendi i ngjarjes pas aksidentit. Ai akuzohet për veprat penale “Përkrahja e autorit të krimit” dhe “Veprime që pengojnë zbulimin e së vërtetës”.
Ndërkohë, gjykata ka liruar nga burgu shtetasin Danjel Koxha, 34 vjeç, me detyrë menaxher i firmës për prodhimin e betonit, “HEL-JON” sh.p.k.në të cilën ishte i punësuar Aleksandër Krrashi. Ndaj tij është caktuar masa e sigurisë “detyrim paraqitje”, teksa akuzohet për veprat penale “Shkelja e rregullave të qarkullimit rrugor”, “Shkelja e rregullave të mbrojtjes në punë”, “Punësimi i paligjshëm” dhe “Fshehja e të ardhurave”.
“Nga verifikimet e kryera ka rezultuar se menaxheri nuk kishte marrë masa për pajisjen e betonieres, me dokumentacionin e nevojshëm për qarkullim dhe kishte punësuar drejtuesin e betonieres, pa patur leje drejtimi për këtë kategori mjetesh.” – njoftoi Policia dy ditë më parë.
Ndërkohë, vijon të jetë ende në kërkim shtetasi Samir Hoxha, 27 vjeç, pronar dhe administrator i kompanisë “HEL-JON” sh.p.k., ku ishte i punësuar Aleksandër Krrashi. Samir Hoxha është djali i biznesmenit Ruzhdi Hoxha, i cili u gjet i vrarë më 6 nëntor 2021 në Qafë Mollë.
Si ndodhi aksidenti?
Dyshohet se 25-vjeçari Enejdi Laçi, po lëvizte me shpejtësi tej normave të lejuara me automjetin e tij tip “Mercedez Benz” dhe ka përplasur nga mbrapa betonieren e ndaluar në rrugë dhe që drejtohej nga Aleksandër Krrashi.
Pas përplasjes, makina ka shpërthyer në flakë, dhe fatkeqësisht kanë humbur jetën, veç shoferit, dhe vëllai i tij pasagjer Erildi Laçi, 20 vjeç, dhe dy pasagjerët e tjerë Enrikejd Kurti, 24 vjeç dhe Andi Laçi, 22 vjeç, duke u djegur brenda mjetit.
Erildi Laçi sapo ishte kthyer nga Gjermania dhe i vëllai i tij, së bashku me kushëririn dhe shokun kishin shkuar për ta marrë në aeroportin e Rinasit.