Pas triumfit të tij të madh në finalen e Big Brother VIP Albania 4, ku rrëmbeu çmimin prej 100 mijë eurosh në mbrëmjen e 19 prillit, Gjesti ka bërë mbrëmjen e së dielës daljen e tij të parë publike jashtë shtëpisë më të famshme në Shqipëri.
Fituesi i edicionit të katërt të BBVA ishte i ftuar special në skenën e spektaklit humoristik “Portokalli”, ku u prit me shumë entuziazëm nga publiku. Të gjithë prisnin me kuriozitet të mësonin më shumë për planet e tij të ardhshme, emocionet pas fitores dhe, natyrisht, për marrëdhënien me Eglin, një nga temat më të përfolura pas përfundimit të spektaklit.
Në një moment të programit, aktori Visjan Ukcenaj, në rolin e tij humoristik si “Minioni”, nuk hezitoi ta provokonte me një pyetje direkte dhe thumbuese:
“Bëre gjë me Eglin tani që dole?”
Gjesti, i njohur për natyrën e tij të drejtpërdrejtë dhe spontane, nuk u ndal shumë për të menduar. Me një buzëqeshje të madhe dhe plot humor, ai u përgjigj shkurt:
“U kry!”
Reagimi i tij shkaktoi të qeshura dhe ovacione nga audienca në sallë, ndërkohë që kjo deklaratë la pak vend për dyshime: ai konfirmoi publikisht afrimin me Eglin pas daljes nga “Big Brother VIP”.
Ky moment shënoi një nga kulmet e mbrëmjes në “Portokalli”, duke sjellë jo vetëm të qeshura, por edhe duke dhënë një sinjal të qartë për ndjekësit e tyre, të cilët prej kohësh spekulonin mbi ecurinë e marrëdhënies së tyre jashtë shtëpisë së BBVA.
Kujtojmë që gjatë qëndrimit në shtëpi, Gjesti dhe Egli krijuan një raport shumë të afërt dhe të komentuar, që në shumë momente ngjalli diskutime të nxehta mes fansave dhe publikut të gjerë.
Pas fitores, Gjesti është shprehur se planet e tij për të ardhmen përfshijnë projekte të reja profesionale dhe, siç duket, edhe ndërtimin e një lidhjeje më të fortë personale me Eglin.