Eni Kokomani, një teolog shqiptar me banim në Iran, ka ofruar një perspektivë interesante mbi marrëdhëniet mes Iranit dhe Shqipërisë në lidhje me strehimin e muxhahedinëve iranianë. Në një intervistë për emisionin “Now” në Euronews Albania, Kokomani ka theksuar se Irani nuk e konsideron Shqipërinë si një vend armik për shkak të kësaj çështjeje.
Sipas tij, Irani nuk e sheh opozitën iraniane të vendosur në Shqipëri si një kërcënim madhor për regjimin. Kokomani ka përcjellë atë që ai ka dëgjuar në Iran, sipas së cilës Izraeli dhe Shtetet e Bashkuara të Amerikës janë aktorët që financojnë dhe përdorin muxhahedinët për të kryer sulme kundër Iranit.
“Sa kam dëgjuar, Irani nuk e sheh si kërcënim të madh lëvizjen e muxhahedinëve në Shqipëri. Izraeli, thuhet në Iran i financon bashkë me SHBA dhe i përdor për sulme kundër Iranit. Irani nuk ka armiqësi me Shqipërinë. I vetmi problem janë muxhahedinët. Irani ka pasur marrëdhënie shumë të mirë me Shqipërinë, por me ardhjen e muxhahedinëve, e shtyrë nga SHBA Shqipëria i ndërpreu marrëdhëniet diplamtike me Iranin. Nuk është thënë deri tani që do ketë ndonjë ndërhyrje në Shqipëri sa i përket ekzistencës së tyre atje”, ka deklaruar teologu Kokomani.
Këto komente sugjerojnë një ndarje të qartë në perceptimin e Iranit, ku faji për aktivitetet e muxhahedinëve adresohet kryesisht tek Izraeli dhe SHBA-ja, ndërsa Shqipëria shihet si një vend që ka vepruar nën ndikimin e këtyre fuqive të huaja, duke mos pasur vetë një qëllim armiqësor ndaj Iranit. Pavarësisht ndërprerjes së marrëdhënieve diplomatike, Kokomani nuk ka raportuar ndonjë indikacion të një ndërhyrjeje të mundshme iraniane në Shqipëri në lidhje me praninë e muxhahedinëve.