Ish-Presidenti Bamir Topi ka komentuar deklaratën e kryeministrit Edi Rama, i cili tha se SPAK nuk duhet të guxojë të prekë telefonin e tij.
Topi tha se ky reagim i Ramës vjen si pasojë e një situate psikologjike të paqëndrueshme. Ai shton se ky është një reflektim i pasigurisë që kryeministri ndjen për hetimet që lidhen me pozitat e tij dhe të bashkëpunëtorëve.
“Deklarata e Ramës tregon një pasiguri të thellë. Ai nuk mund të jetë i qetë me atë që po ndodh në kampin e tij. Kur bashkëpunëtorët e tij po hetohen për shumë afera, si është e mundur që ai të jetë jashtë këtyre hetimeve? Nëse ai thotë se është i pastër, atëherë duhet të pranojmë se ai është i paaftë për të administruar ekipin e tij”, u shpreh ish-presidenti.
Bamir Topi ka sugjeruar se Rama mund të pohojë se është jashtë çdo hetimi, por thekson se kjo mund të jetë një shenjë e paaftësisë për të ushtruar kontroll mbi njerëzit që e rrethojnë.