Pas një beteje të gjatë me drejtësinë, një lufte të ashpër me akuza ndaj Prokurorisë së Posaçme Antikorrupsion, lideri i Partisë Demokratike, Sali Berisha, vijon të zbatojë me rigorozitet masën e ndryshuar në janar të këtij viti, atë të “detyrimit të paraqitjes”, 2 herë në muaj, para oficerit të SPAK. Edhe sot, në daljen e tij, tha përpara mediave, se kjo strukturë e posaçme, nuk do të egzistojë. Duke u perifrazuar më pas edhe nga kryeministri Edi Rama, si “SPAK do të shuhet”. Madje kjo deklaratë i shërbeu kreut të qeverisë, për t’i bërë thirrje popullit shqiptar se nëse votojnë kryedemokratin Berisha dhe partinë e tij, do të humbasin institucionin më të rëndësishëm në vend, që trumbetohet me të madhe nga çdo qytetar i thjeshtë në vendin tonë.
Kjo duket se është vetëm përplasja këtu.
Por nga ana tjetër, arena ndërkombëtare politike, ecën po ashtu në ujëra aspak të qeta. Fitorja e Trump në Amerikë ka sjellë polemika, debate, bllokime, por, për Partinë Demokratike dhe liderin e saj Sali Berisha, është konsideruar si një dritë jeshile. Sali Berisha, prej të paktën 4 vitesh, nuk shkel dot më tokën amerikane. Kjo për shkak se u shpall “Non Grata”. Duke iu mohuar kështu e drejta për ta vizituar këtë vend, për çfarëdolloj arsyeje. Një masë e tillë shtrënguese, është përgjithësisht e përhershme, por edhe në raste ndryshimesh politikash, shumë e vështirë, dhe proceduralisht e gjatë për t’u hequr. Në kushtet kur politika atje është favorite për Partinë Demokratike këtu, duket se ka shtuar dëshirën e liderit të selisë blu për ta prekur qoftë edhe njëherë tokën amerikane. Por si?
E vetmja mënyrë është një vizë speciale, që nuk nënkupton heqjen e “Non grata”. Pikërisht, thotë një burim i besueshëm për Replikë, kjo është surpriza e radhës. Sali Berisha brenda shumë pak ditësh, do të zhvillojë një vizitë në shtetin amerikan. Një vizitë që do të pasohet me të tjera surpriza, po aq të mëdha sa kjo e ikjes. Por meqë ajo se çfarë do të ndodhë në të ardhmen është surprizë, do të presim deri sa të kthehet për t’i mësuar…/Replika.al/