Studentët nga e gjithë Shqipëria pritet të mblidhen sot, më 24 tetor, në Tiranë, për një protestë kombëtare përpara Kryeministrisë. Tubimi vjen në ditën e 12-të të protestave studentore, ndërsa lëvizja po merr mbështetje edhe nga grupe të tjera të shoqërisë.
Në mbështetje të studentëve kanë njoftuar pjesëmarrjen pedagogë, mjekë, artistë, përfaqësues të bizneseve dhe sindikatave. Thirrje për solidarizim janë bërë edhe ndaj shqiptarëve të diasporës.
Sipas organizimit të paralajmëruar, pedagogët pritet të mblidhen në orën 10:00 pranë Universitetit Politeknik, ndërsa artistët dhe punonjësit e kulturës janë ftuar të dalin përpara Kryeministrisë në orën 11:00. Në orën 14:00 është parashikuar bashkimi i grupeve studentore në protestën kryesore.
Ndërkohë, Partia Demokratike u ka bërë thirrje strukturave dhe mbështetësve të saj që në orën 12:00 të dalin në mbështetje të protestës së studentëve.
Mobilizimi është shtrirë edhe në qytete të tjera të vendit, nga ku studentët pritet të udhëtojnë drejt kryeqytetit për t’iu bashkuar tubimit.
Protesta e sotme synon të zgjerojë lëvizjen studentore përtej universiteteve, duke bashkuar në një tubim të vetëm të rinj, profesionistë dhe qytetarë që kërkojnë dorëheqjen e kryeministrit dhe kushte më të mira jetese.
