Qeveria ka ndryshuar sërish vendimin për shpërblimin e punonjësve të Policisë së Shtetit, të angazhuar gjatë protestave, duke rritur numrin e efektivëve përfitues dhe fondin e parashikuar për ta.
Sipas vendimit të ri të Këshillit të Ministrave, numri i punonjësve që do të përfitojnë shpërblim rritet nga 2 750 në 2 821 efektivë, pra 71 më shumë se në vendimin e 19 tetorit.
Ndërkohë, fondi i përgjithshëm për shpërblimet është rritur nga 740 milionë e 80 mijë lekë në 759 milionë e 187 mijë e 520 lekë, një shtesë prej mbi 19 milionë lekësh.
Nga përllogaritja e fondit të përgjithshëm, rezulton se për çdo efektiv është parashikuar një shumë mesatare prej 269 120 lekësh të vjetra, ose 26 912 lekë të reja.
Për zbatimin e vendimit janë ngarkuar Ministria e Financave, Ministria e Punëve të Brendshme dhe Drejtoria e Përgjithshme e Policisë së Shtetit.
Vendimi hyn në fuqi menjëherë dhe do të botohet në Fletoren Zyrtare. Dokumenti mban emrin e kryeministrit Edi Rama, ndërsa në mungesë dhe me porosi të tij është firmosur nga zëvendëskryeministrja Albana Koçiu.
VENDIMI I QEVERISË:
DISA NDRYSHIME NË VENDIMIN NR.787, DATË 19.10.2026, TË KËSHILLIT TË MINISTRAVE, “PËR DHËNIE SHPËRBLIMI PUNONJËSVE TË POLICISË SË SHTETIT DHE PËR NJË SHTESË NË BUXHETIN E MINISTRISË SË PUNËVE TË BRENDSHME, MIRATUAR PËR VITIN 2026”
Në mbështetje të nenit 100 të Kushtetutës, të neneve 5 e 45, të ligjit nr.9936, datë 26.6.2008, “Për menaxhimin e sistemit buxhetor në Republikën e Shqipërisë”, të ndryshuar, të nenit 14, të ligjit nr.87/2025, “Për buxhetin e vitit 2026”, të ndryshuar, dhe të ligjit nr.82/2024, “Për Policinë e Shtetit”, të ndryshuar, me propozimin e ministrit të Punëve të Brendshme, Këshilli i Ministrave
V E N D O S I:
1. Në vendimin nr.787, datë 19.10.2026, të Këshillit të Ministrave, “Për dhënie shpërblimi punonjësve të Policisë së Shtetit dhe për një shtesë në buxhetin e Ministrisë së Punëve të Brendshme, miratuar për vitin 2026”, bëhen këto ndryshime:
a) Në pikën 1, numri “2 750 (dy mijë e shtatëqind e pesëdhjetë)” zëvendësohet me “2 821 (dy mijë e tetëqind e njëzet e një)”.
b) Në pikat 2 dhe 3, fondi “740 080 000 (shtatëqind e dyzet milionë e tetëdhjetë mijë) lekë” zëvendësohet me “759 187 520 (shtatëqind e pesëdhjetë e nëntë milionë e njëqind e tetëdhjetë e shtatë mijë e pesëqind e njëzet) lekë”.
2. Ngarkohen Ministria e Financave, Ministria e Punëve të Brendshme dhe Drejtoria e Përgjithshme e Policisë së Shtetit për zbatimin e këtij vendimi.
Ky vendim hyn në fuqi menjëherë dhe botohet në “Fletoren zyrtare”.
K R Y E M I N I S T R I
EDI RAMA
