Greqia qendrore dhe jugore është përfshirë nga moti i keq këtë të diel, me reshje të dendura shiu, stuhi dhe mundësi për breshër. Shërbimi Meteorologjik grek ka shpallur alarm portokalli, ndërsa fenomenet më të forta po regjistrohen në ishullin Evia dhe në Sporade, grupi i ishujve në Egjeun veriperëndimor.
Gjatë ditës, reshje të forta dhe stuhi priten në Thesalinë lindore, në zonën e Volosit dhe Magnezisë, në Sporade, në pjesën perëndimore të Kretës dhe në ishujt Cyclades. Në Evia, një nga ishujt më të mëdhenj të Greqisë që ndodhet pranë Athinës, moti i keq pritet të vazhdojë deri pasdite.
Situata rëndohet edhe nga erërat e forta verilindore, të cilat në Egjeun qendror dhe verior pritet të arrijnë 7–8 ballë Beaufort. Reshje dhe stuhi parashikohen gjithashtu në Greqinë Qendrore dhe Peloponezin lindor.
Edhe Athina preket nga vala e motit të keq. Reshjet priten kryesisht në zonat veriore dhe lindore të kryeqytetit, ndërsa përmirësimi i motit parashikohet gradualisht drejt mbrëmjes. Temperaturat në Athinë do të lëvizin nga 18 deri në 22 gradë Celsius.