Detaje të reja janë zbardhur nga ngjarja e rëndë e ndodhur në Porto Palermo të Himarës, ku katër persona kanë pësuar djegie pasi një skaf u përfshi nga flakët gjatë punimeve për riparimin e motorit.
Sipas të dhënave paraprake, katër personat ndodheshin në breg të detit dhe po punonin në pjesën e motorit të skafit, kur benzina e pranishme pranë motorit dhe në serbator mori flakë.
Dyshimet e para janë se në momentin e incidentit njëri prej personave po konsumonte një cigare dhe kontakti me avujt e karburantit mund të ketë shkaktuar ndezjen.
Flakët janë përhapur me shpejtësi, duke përfshirë katër personat që ndodheshin pranë skafit. Për t’u shpëtuar flakëve, ata janë hedhur menjëherë në det.