Një ngjarje e rëndë është raportuar në Bosnje dhe Hercegovinë, ku një konflikt mes dy familjarëve ka përfunduar me humbjen e jetës së një 41-vjeçari.
Sipas raportimeve, ngjarja ka ndodhur në periferi të Sarajevës, ku Emir Hadžić (41) kishte shkuar në banesën e familjarëve për një takim, gjatë të cilit pritej të diskutoheshin disa çështje personale.
Megjithatë, takimi dyshohet se është shndërruar në një debat të ashpër mes tij dhe baxhanakut të tij, Nermin Kovačević (44). Sipas informacioneve paraprake, përplasja verbale është përshkallëzuar, duke përfunduar me përdorimin e një arme zjarri.
Dëshmitarët kanë deklaruar se fillimisht janë dëgjuar debate dhe britma nga banesa, ndërsa pak çaste më vonë janë dëgjuar të shtëna me armë, të cilat alarmuan banorët e zonës.
Pas të shtënave, familjarët kanë tentuar t’i japin ndihmën e parë 41-vjeçarit deri në mbërritjen e ekipeve të emergjencës, por plagët e marra rezultuan fatale dhe mjekët konstatuan vdekjen e tij në vendngjarje.
Forca të shumta policore mbërritën menjëherë në vendin e ngjarjes, rrethuan zonën dhe arrestuan autorin e dyshuar. Ndërkohë, grupi hetimor ka nisur hetimet për të zbardhur plotësisht rrethanat e ngjarjes dhe motivin që çoi në konfliktin fatal.
Banorët e zonës janë shprehur të tronditur, duke deklaruar se dy familjet njiheshin prej vitesh dhe se nuk prisnin që mosmarrëveshjet të përfundonin në një tragjedi të tillë.
Autoritetet boshnjake nuk kanë dhënë ende një version përfundimtar mbi motivin e krimit, ndërsa hetimet janë në vijim.