Një skandal ka tronditur skenën muzikore në Peru, pasi këngëtarja kryesore e grupit të njohur të muzikës cumbia “La Bella Luz”, Naldy Saldaña, ka akuzuar drejtorin muzikor të grupit, Cesar Sanchez Chavista, për ngacmim seksual dhe fizik.
Artistja ka bërë të ditur se ka depozituar një kallëzim pranë autoriteteve kompetente, duke kërkuar hetimin e plotë të rastit. Sipas saj, bashkë me denoncimin ka dorëzuar edhe materiale audio dhe video që, sipas pretendimeve të saj, dokumentojnë incidentin.
Pamjet që kanë nisur të qarkullojnë në rrjetet sociale tregojnë këngëtaren duke u përpjekur të largohet, ndërsa drejtori muzikor shihet duke e kapur nga krahu dhe duke e tërhequr drejt vetes. Sipas Saldañës, kjo sjellje ishte e padëshiruar dhe përbën pjesë të denoncimit të saj ndaj tij.
Videoja është shpërndarë gjerësisht në platformat sociale dhe ka shkaktuar reagime të shumta në opinionin publik në Peru.
Pas publikimit të pamjeve, anëtarë aktualë dhe ish-anëtarë të grupit “La Bella Luz” kanë dalë publikisht në mbështetje të këngëtares, duke kërkuar që rasti të hetohet deri në fund dhe të zbardhen të gjitha rrethanat.
Ndërkohë, përmes një njoftimi zyrtar, grupi muzikor ka bërë të ditur se ka pezulluar përkohësisht nga detyra drejtorin muzikor Cesar Sanchez Chavista, deri në përfundimin e hetimeve nga autoritetet.
Deri në këtë fazë, akuzat e ngritura nga këngëtarja mbeten objekt i hetimeve dhe nuk janë provuar në gjykatë. Autoritetet pritet të shqyrtojnë provat e dorëzuara dhe të vendosin për hapat e mëtejshëm ligjorë.
Grupi “La Bella Luz”, me seli në qytetin Monsefú, është një nga formacionet më të njohura të muzikës cumbia në Peru dhe gëzon popullaritet të madh në Amerikën Latine.