Aktori amerikan, James Handy, i njohur për rolet në filma si “Top Gun: Maverick”, “Jumanji” dhe “Logan”, është gjetur i vdekur në shtëpinë e tij në Los Angeles.
Mediat e huaja shkruajnë se, ngjarja e rëndë ka ndodhur pas një sulmi me thikë që dyshohet se është kryer nda djali i partneres së tij.
Departamenti i Policisë së Los Angeles ka njoftuar se 81-vjeçari u gjet në oborrin e përparmë të banesës së tij në Tarzana, Kaliforni, rreth orës 09:30 të mëngjesit të së mërkurës.
Sipas policisë, James Handy ishte pa ndjenja dhe kishte disa plagë me thikë në kraharor.
Gjithashtu bëhet e ditur se autoritetet arrestuan 44-vjeçarin Michael Gledhill, djalin e partneres së aktorit, i cili është akuzuar për vrasje. Për të është vendosur një garanci prej 2 milionë dollarësh.
“Unë jam biri i atij burrit, sapo vrava njeriun e mëkatit”, ka deklaruar i dyshuari gjatë një telefonate në numrin e emergjencës 911.
Kur forcat e rendit mbërritën në vendngjarje, ai u ka thënë oficerëve se ishte personi që po kërkonin.
“The Guardian” shkruan se hetimet e para tregojnë se i dyshuari jetonte në të njëjtën banesë me nënën e tij, e cila ishte në një marrëdhënie me viktimën.
Aktri 81-vjeçar, i lindur në Nju Jork, kishte një karrierë të gjatë në televizion dhe film, e cila nisi në vitin 1977 me serialin “Ryan’s Hope”.
Gjatë karrierës së tij, James Handy u shfaq në prodhime të njohura si “Law & Order”, “NCIS: Los Angeles” dhe “Criminal Minds”, ndërsa filmi i tij i fundit ishte “Top Gun: Maverick” në vitin 2022.