Një autobus me pushues nga Kosova është sulmuar me gurë derisa ishte në qarkullim në Kukës, gjatë kthimit drejt Kosovës, raporton Gazeta Sinjali.
Ngjarja ka ndodhur të hënën në rrugën e aeroportit në Kukës, ku persona ende të paidentifikuar kanë hedhur gurë në drejtim të autobusit, duke shkaktuar dëme materiale.
Si pasojë e sulmit është thyer njëri prej xhamave të përparmë të autobusit, ndërsa të dyshuarit janë larguar nga vendi i ngjarjes.
Sipas informacioneve të siguruara, nuk raportohet për persona të lënduar.
Kompania kosovare që operon autobusin e ka konfirmuar rastin për Gazetën Sinjali, por ka kërkuar që identiteti i saj të mbetet anonim.