Kryetari i Partisë Demokratike, Sali Berisha, ka reaguar pas emërimit të ish-zyrtares së PD-së, Jola Hysaj, në krye të Agjencisë Kombëtare të Turizmit, duke e konsideruar të papranueshëm kalimin e ish-bashkëpunëtorëve të tij në radhët e mazhorancës socialiste.
Gjatë një deklarate për mediat, Berisha u ndal te largimi i disa ish-zyrtarëve të Partisë Demokratike, mes tyre edhe Hysaj, e cila pak ditë më parë konfirmoi marrjen e detyrës së re dhe publikoi versionin e saj për vendimin.
“Është fatkeqësi që kanë qenë pranë meje ata. Të bashkohesh me Edi Ramën, të bashkohesh me një armik të egër të ekzistencës së kombit shqiptar, shkelmon mbi vetë substancën!”, deklaroi Berisha.
Deklarata vjen pas debatit që shoqëroi emërimin e Jola Hysajt në krye të Agjencisë Kombëtare të Turizmit. Vetë Hysaj sqaroi se kishte dhënë dorëheqjen nga Partia Demokratike muaj më parë dhe se pranimi i detyrës lidhej me një angazhim profesional, ndërsa tregoi edhe bisedën që, sipas saj, kishte zhvilluar me kryeministrin Edi Rama përpara emërimit.