Detaje të reja kanë dalë nga debatet e ashpra që raportohet se janë regjistruar në mbledhjen e Grupit Parlamentar të PS-së, e zhvilluar këtë të premte, mes kryeministrit Edi Rama, deputetëve të Partisë Socialiste dhe ministrave.
Mësohet se, pas përplasjes së fortë me tone të larta me kryeministrin Edi Rama, deputeti Erion Braçe ka vendosur të largohet nga mbledhja. Edhe pse kreu i Grupit Parlamentar të PS-së, Taulant Balla, ka ndërhyrë për të ulur tensionet, Braçe është larguar nga mbledhja në mënyrë demonstrative.
Po ashtu, kritika ka pasur edhe për ministrat. Mësohet se kryeministri Rama ka kritikuar ashpër ministrin e Brendshëm, Besfort Lamallari, për mënyrën e përballimit të protestave, raporton VNA.
Ndërsa edhe ministri i Bujqësisë, Andis Salla, nuk ka mbetur pa u kritikuar. Bëhet fjalë për rastin e përmendur edhe në fjalimin e tij publik, ku një kërkesë e një qytetari për një investim ishte lënë për tre vite pa përgjigje.
Rama i është rikthyer gjithashtu vërejtjeve të përsëritura ndaj “luftës së bërrylave” në gjirin e PS-së, duke deklaruar se: “Të gjithë duhet ta kuptojnë se sulmet mes njëri-tjetrit nuk bëjnë gjë tjetër veçse ulin aksionet e ndërmarrjes sonë të përbashkët dhe, rrjedhimisht, edhe aksionet e secilit prej jush.”
Debate të ashpra raportohet se janë regjistruar në mbledhjen e Grupit Parlamentar të PS-së, e zhvilluar këtë të premte, mes kryeministrit Edi Rama dhe deputetit Erion Braçe. Ishte ky i fundit që shprehu pakënaqësinë e tij në lidhje me votimet e kryera një ditë më parë në seancën plenare të Kuvendit.
Erion Braçe ka kritikuar mënyrën se si u miratuan dhe u votuan anëtarët e Komisionit të Prokurimit Publik (KPP), ku u zgjodh edhe kreu i ri i këtij institucioni të rëndësishëm.
Sipas VNA, deputeti socialist ka kundërshtuar faktin se deputetët votuan për kandidatë që nuk i njihnin dhe për të cilët nuk ishte zhvilluar asnjë diskutim paraprak.
“Votuam njerëz që nuk i njohim. Na i sillni gjërat gati dhe kërkoni të votojmë me sy mbyllur”, raportohet të ketë thënë Braçe.
Por kjo deklaratë nuk i ka pëlqyer Ramës, i cili i është përgjigjur Braçes duke thënë se anëtarët e KPP-së janë propozim i qeverisë dhe se votimi i tyre në Kuvend është një kërkesë e Bashkimit Evropian.
“Ata janë verdikti i qeverisë. Ç’të bëj që na e kërkon BE-ja? Se nuk e sillnim fare në Kuvend“, mësohet të ketë thënë Rama.
Megjithatë, Braçe nuk është tërhequr dhe ka replikuar sërish me kryeministrin. Në atë moment, Rama ka humbur durimin dhe i është drejtuar deputetit socialist me tone të larta: “Qepe gojën. Mos fol mbi mua. Ik p*rdhu.”
Pas debatit me Braçen, Rama ka lëshuar edhe një mesazh që është interpretuar si paralajmërim për të gjithë deputetët socialistë.
“Do ta bëj ndonjërin shembull. Se deri tani kam menduar që nuk ju punojnë mirë neuronet”, mësohet të ketë thënë ai.
Kujtojmë se kjo nuk është hera e parë që Rama përplaset me deputetët e PS-së gjatë mbledhjeve të Grupit Parlamentar. Edhe më herët ai është përplasur me Elisa Spiropalin, ndërsa nuk kanë munguar as paralajmërimet për përjashtime.