Të paktën 11 persona ndërruan jetë pasi një aeroplan civil u rrëzua në qytetin Tombaline në verilindje të Francës këtë të dielë.
Aeroplani i përkiste një shkolle parashutizmi dhe ishte nisur nga aeroporti Nancy-Essey, por vetëm pak pasi u ngrit në fluturim u rrëzua. Sipas të dhënave paraprake të autoriteteve lokale mes viktimave janë piloti, pesë studentë dhe pesë instruktorë.
Forca të shumta policie, zjarrfikëse dhe ekipe emergjence mbërritën menjëherë në vendin e ngjarjes, autoritetet u kanë bërë thirrje qytetarëve që të shmangin zonën përreth, teksa hetimet vazhdojnë për të zbardhur shkaqet e aksidentit. Ministri i Brendshëm i Francës është nisur drejt vendit të ngjarjes për të ndjekur nga afër situatën.