Një grabitje e organizuar në mënyrë të shpejtë dhe spektakolare ka ndodhur në një dyqan bizhuterish në Fremont, në shtetin e California, ku rreth 20 persona kanë arritur të marrin mallra me vlerë rreth 1.4 milionë dollarë brenda pak më shumë se një minute.
Ngjarja ka ndodhur në qershor të vitit 2025, ndërsa pamjet e grabitjes janë bërë së fundmi virale në rrjetet sociale. Sipas raportimeve, autorët kanë hyrë në dyqan dhe kanë përdorur çekiçë dhe mjete të forta për të thyer vitrinat e xhamit, duke marrë rreth 75 deri në 80 për qind të bizhuterive të ekspozuara.
Sipas raportimit të New York Post, grabitja ka zgjatur rreth 70 sekonda. Pas marrjes së bizhuterive, autorët janë larguar me shpejtësi me automjetet që i prisnin jashtë dyqanit.
Policia ka arritur të arrestojë katër persona të moshës nga 20 deri në 29 vjeç, ndërsa dy prej tyre janë liruar më pas. Hetimet vijojnë për identifikimin dhe kapjen e pjesëtarëve të tjerë të grupit që morën pjesë në grabitje.