Të hënën në mbrëmje, Lëvizja Vetëvendosje zhvilloi një tubim elektoral në Podujevë, ku kryeministri Albin Kurti përcolli mesazhe politike dhe ekonomike për qytetarët, duke bërë edhe një njoftim që u prit me interes të madh nga të pranishmit.
Gjatë fjalimit të tij, Kurti deklaroi se vendimi i parë që do të ndërmarrë në mandatin e ri qeverisës do të jetë ekzekutimi i pagës së 13-të, një masë që synon rritjen e mirëqenies për punëtorët dhe mbështetjen direkte të ekonomive familjare.
Sipas tij, ndryshe nga praktikat e deritanishme apo pritshmëritë e zakonshme, pagesa e 13-të nuk do të ekzekutohet në fund të vitit, por në fillim të vitit, duke synuar që qytetarët të kenë më shumë siguri financiare që në muajt e parë të vitit të ri.
Ky premtim u shoqërua me duartrokitje nga pjesëmarrësit në tubim, ndërsa Kurti theksoi se qeveria që ai synon të drejtojë edhe në mandatin e ardhshëm do të vijojë politikat sociale dhe ekonomike që, sipas tij, vendosin punëtorin dhe qytetarin në qendër të vendimmarrjes.
Deklarata e bërë në Podujevë pritet të jetë pjesë e debateve politike në ditët në vijim, veçanërisht në lidhje me ndikimin buxhetor dhe mënyrën e zbatimit të pagës së 13-të në sektorin publik dhe privat.