Lideri demokrat Sali Berisha paralajmëron se këtë të shtunë, do të mblidhet Kryesia e Partisë Demokratike dhe pritet të merren vendime të guximshme dhe vendimtare, për atë që ai e quan beteja finale e demokratëve.
Për herë të parë, mbrëmjen e djeshme i ka pranuar atë që ndodhi me zgjedhjen e Endri Shabanit si Avokat i Popullit dhe u ka kërkuar ndjesë demokratëve në gjithë Shqipërinë.
Edhe sot, pak momente më parë ai ka reaguar në llogarinë e tij dhe thotë se gabimet janë njerëzore. Partia Demokratike është gjendur kohët e fundit në situata të paprecedenta, ndërsa anëtarësia ka kërkuar reagim nga Sali Berisha.
“Gabimet janë njerëzore, por qëndresa është ADN-ja e demokratëve. Sot në mbledhjen e kryesisë, kryesia do marrë vendimet për t’u angazhuar në betejën vendimtare, betejën finale”, shkruan lideri demokrat, duke paralajmëruar vendime të forta.
Partia Demokratike nuk nxori kandidatë në zgjedhjet e pjesshme lokale, duke pranuar të mbështeste kandidatët e pavarur dhe shënoi një humbje të fortë, ndërkohë që anëtarësia kërkoi reagim.
Në mungesë të një përgjigje, Ervin Salianji dhe më të votuarit e Primareve në PD kanë nisur një lëvizje brenda partisë më të madhe të opozitës. “Kafja” e tyre ka trazuar ujërat në Partinë Demokratike dhe tashmë Salianji ka nisur foltoret e tij, pavarësisht se ka deklaruar se nuk synon të bëhet kryetar.
Skandali më i rëndë që përfshiu këtë forcë politike, u regjistrua dy ditë më parë kur me firmat e deputetëve demokratë Endri Shabani shkoi në Kuvend si kandidat për postin e Avokatit të Popullit dhe me votat e socialistëve u zgjodh.
Deputetët dhe vet Sali Berisha kanë nisur me radhë t’ju kërkojnë ndjesë demokratëve.