Tiranë – Dy javë pas vendimit për ndalimin e përdorimit të monopatinave elektrike, Ministrja e Punëve të Brendshme, Albana Koçiu, zhvilloi një tryezë pune me institucionet kyçe të sigurisë rrugore për të hartuar kuadrin e ri ligjor.
Nëpërmjet një postimi në rrjetet sociale, Ministrja konfirmoi se ndalimi i përkohshëm do të vijojë derisa të vendosen rregulla të qarta dhe standarde të reja sigurie.
Hartimi i Rregullave Të Reja
Koçiu theksoi se vendimi për ndalimin u mor për të garantuar sigurinë e qytetarëve, pas një sërë aksidentesh dhe problematikash të raportuara. Ajo detajoi fokusin e draftit ligjor që po punohet:
“Po hartojmë rregullat e reja që do të përcaktojnë standardet teknike të monopatinave, rregullat e qarkullimit dhe zonat e lejuara. Do të përcaktohen gjithashtu përgjegjësitë për institucionet që do të sigurojnë zbatimin e ligjit.”
Sipas Ministres, qëllimi final është integrimi i këtyre mjeteve në trafikun urban në mënyrë të sigurt dhe moderne.
Monopatinat do të lejohen sërish për qarkullim vetëm pasi të jenë miratuar rregullat e reja, duke siguruar pajtueshmëri me standardet e sigurisë dhe jetën urbane. Policia Rrugore ka intensifikuar kontrollet për zbatimin e ndalimit, ndërsa drafti ligjor pritet të kalohet për konsultim publik në javët në vijim.