Një ngjarje e rëndë ka ndodhur mbrëmjen e kësaj të mërkure në qendër të Tiranës, pranë stadiumit “Air Albania”, ku një person është gjetur i pajetë në trotuar.
Sipas burimeve të para policore, viktima ende nuk është identifikuar, ndërsa dyshohet se ka ndërruar jetë për shkaqe natyrale. Dëshmitarët në vendngjarje kanë treguar se personi po ecte në këmbë kur papritur është rrëzuar në tokë dhe nuk ka dhënë më shenja jete.
Forcat e Policisë së Tiranës mbërritën menjëherë në vendngjarje, ku kanë rrethuar zonën dhe po kryejnë veprimet e para hetimore. Ndërkohë, grupi hetimor, nën drejtimin e prokurorit të gatshëm, po punon për identifikimin e viktimës dhe sqarimin e plotë të rrethanave të vdekjes.
Trupi i pajetë është dërguar në Institutin e Mjekësisë Ligjore, ku pritet të kryhet ekspertiza mjeko-ligjore për të përcaktuar shkakun e saktë të ndarjes nga jeta.
Ngjarja ka shkaktuar panik tek kalimtarët që ndodheshin në zonë në momentin e incidentit, ndërsa për disa minuta është vështirësuar edhe qarkullimi në rrugët përreth stadiumit.
Autoritetet u bëjnë thirrje qytetarëve që nëse kanë informacione për identitetin e viktimës, të kontaktojnë me numrin e urgjencës 112 ose në komisariatin më të afërt.