Një video e rëndë dhune në familje ka tronditur sot kryeqytetin. Pamjet, të cilat qarkullojnë në rrjet, tregojnë një burrë të moshuar teksa dhunon fizikisht dhe verbalisht bashkëshorten e tij në sy të dhjetëra qytetarëve. Ngjarja ka ndodhur pranë një lokali në afërsi të terminalit ndërqytetas në Qytet Studenti.
Skëna e dhunës dhe shkaku i dyshuar
Në video, burri i moshuar shihet duke e tërhequr gruan e tij prej flokësh, duke e ofenduar me fjalë të rënda dhe banale. Gruaja, e poshtëruar para syve të të tjerëve, përpiqet të mbrohet nga dhuna.
Sipas informacioneve paraprake, shkaku i sherrit ka qenë një dyshim për tradhti bashkëshortore. Burri, pasi dyshohet se kishte zbuluar tradhtinë, i ka kërkuar llogari gruas në mes të lokalit, duke e kthyer debatin në një skenë dhune të hapur.
Pasiviteti i dëshmitarëve, një problem shqetësues
Ajo që e bën edhe më të rëndë këtë rast është pasiviteti i qytetarëve të pranishëm. Edhe pse dhuna po ushtrohej haptazi, shumë prej tyre nuk kanë reaguar. Ky pasivitet i shoqërisë shqiptare në raste të tilla shpesh i lë viktimat pa ndihmën e nevojshme.
Redaksia e “Priza.al”, e cila publikoi videon, i ka bërë thirrje autoriteteve që të ndërhyjnë menjëherë për të identifikuar dhe ndëshkuar autorin e dhunës. Ky rast duhet të shërbejë si një alarm për ndërgjegjësimin e shoqërisë për të reaguar kundër dhunës në familje.