Një ngjarje e rëndë është regjistruar pasditen e sotme në fshatin Vidhas të Elbasanit, ku një banesë u përfshi nga flakët, duke shkaktuar një bilanc tragjik. Rreth orës 15:45, zjarri ka shpërthyer në një shtëpi banimi dhe, për fat të keq, një i moshuar që ndodhej brenda nuk arriti të shpëtonte dot.
Sipas informacioneve të para, viktima mbeti i asfiksuar nga tymi i dendur që përfshiu banesën, duke ndërruar jetë në vend.
Menjëherë pas marrjes së njoftimit, në vendngjarje mbërritën forcat zjarrfikëse dhe ambulanca me personelin mjekësor, të cilët ndërhynë me shpejtësi për shuarjen e flakëve dhe dhënien e ndihmës së parë. Megjithatë, përpjekjet e tyre rezultuan të pamjaftueshme për të shpëtuar jetën e të moshuarit.
Aktualisht, ende nuk dihen shkaqet e rënies së zjarrit. Autoritetet policore dhe grupi hetimor po punojnë për të zbardhur rrethanat e plota të ngjarjes dhe për të përcaktuar nëse zjarri ka qenë aksidental apo i shkaktuar nga faktorë të tjerë.
Ngjarja ka tronditur banorët e fshatit Vidhas, të cilët shprehen të shokuar për humbjen e jetës së bashkëfshatarit të tyre dhe apelojnë për më shumë kujdes e masa parandaluese ndaj fatkeqësive të tilla.