Një ngjarje e rëndë ka ndodhur të mërkurën në mëngjes në provincën Mendoza të Argjentinës, ku një vajzë vetëm 14 vjeçe hyri në shkollën e saj me një armë zjarri dhe qëlloi të paktën dy herë. Adoleshentja, që dyshohet të jetë vajza e një polici, u barrikadua brenda shkollës “Marcelino Blanco” në qytetin La Paz, duke shkaktuar panik të madh.
Ndërhyrja e autoriteteve dhe motivet e mundshme
Pas alarmit, policia dhe zjarrfikësit evakuuan me urgjencë nxënësit. Një njësi e specializuar për raste pengmarrjesh (GRIS) negociu me vajzën, e cila më pas u dorëzua pa përdorur forcë. Fatmirësisht, nuk raportohet për të plagosur rëndë.
Motivet e këtij akti ekstrem mbeten ende të paqarta. Policia po heton nëse vajza ka qenë viktimë e bullizmit në shkollë apo ka pasur probleme familjare. Ende nuk ka një deklaratë zyrtare për gjendjen e saj mendore dhe mënyrën se si ajo siguroi armën. Ngjarja ka shkaktuar shok në komunitet, me shumë prindër që prisnin të tmerruar jashtë shkollës për të marrë fëmijët e tyre.