Dita e Premte në Shqipëri do të karakterizohet nga kushte të paqëndrueshme atmosferike. Moti do të nisë me vranësira mesatare deri të dendura, të cilat do të përqendrohen kryesisht në veri gjatë orëve të mbrëmjes.
Reshjet e shiut do të fillojnë që në orët e para të 24-orëshit në veriperëndim dhe do të shtrihen gradualisht në zonën perëndimore dhe atë qendrore. Gjatë mesditës dhe pasdites, shiu do të mbulojë pjesën më të madhe të vendit. Në veriperëndim, perëndim dhe qendër, reshjet do të jenë me intensitet mesatar deri të lartë, duke u shoqëruar hera-herës me shtrëngata dhe shkarkesa elektrike.
Në orët e mbrëmjes, reshjet do të ndërpriten në shumicën e vendit, duke mbetur të pranishme vetëm në veri me intensitet të ulët.
Temperaturat maksimale do të arrijnë deri në 31°C, ndërsa ato minimale do të zbresin në 16°C.
Era do të fryjë nga jugu me një shpejtësi mesatare prej 7 m/s. Përgjatë vijës bregdetare, në zonat luginore dhe gjatë shtrëngatave, shpejtësia e erës pritet të arrijë deri në 20 m/s. Valëzimi në det do të jetë i lartë, i shkallës 4-5 ballë.