Meteorologia Ladja Porja ka dhënë detaje mbi stuhinë e fuqishme që ka përfshirë Shqipërinë. E ftuar në Euronews Albania, ajo shpjegoi se stuhia, e cila ishte formuar në Kanalin e Otrantos, ka prekur fillimisht Durrësin, Shkodrën, Lezhën dhe më pas Tiranën.
Parashikimi për orët dhe ditët në vijim
Sipas meteorologes Porja, situata do të përkeqësohet gjatë orëve të pasdites së sotme. Zonat më të rrezikuara janë Shkodra, Dibra, Kruja, Tirana, Elbasani dhe Durrësi. Për jugun, priten rrebeshe shiu në Vlorë, Sarandë dhe Gjirokastër. Në Tiranë, reshjet do të jenë më intensive nga ora 15:00 deri në 18:00, ndërsa era e fortë do të vazhdojë deri në mbrëmje.
Pritet që moti të përmirësohet gjatë ditës së nesërme, por me një rënie të ndjeshme të temperaturave, të cilat do të zbresin deri në 27 gradë Celsius. Sipas Porjas, këto stuhitë janë tipike për këtë periudhë dhe pritet të rikthehen sërish në muajin shtator.
Megjithatë, i nxehti do të kthehet sërish në mes të javës së ardhshme, me temperatura që pritet të arrijnë deri në 35 gradë Celsius.