Një aksident i rëndë automobilistik ka tronditur qytetin e Beratit në orët e para të mëngjesit të së dielës, duke i marrë jetën një 29-vjeçari dhe duke lënë pas dhimbje të pamatë për familjen e tij.
Viktima, Ornel Caushaj, udhëtonte së bashku me bashkëshorten e tij, gazetaren e njohur Sindi Salaj, kur mjeti me të cilin po lëviznin doli nga rruga në fshatin Moravë. Përplasja rezultoi fatale për drejtuesin e mjetit, ndërsa Sindi Salaj shpëtoi me lëndime të lehta.
Pas kësaj tragjedie, gazetarja ka ndarë në rrjetet sociale një mesazh të thellë e prekës për humbjen e bashkëshortit, duke e përshkruar si plagën më të madhe të jetës së saj.
“Zoti ishte xheloz sa shumë të doja unë, ndaj të mori pranë vetes. Thonë se koha shëron plagët, por s’besoj se ka kohë që mund të shërojë plagën e shpirtit tim.
Do takohemi sërish një ditë, drita ime. Deri atëherë, na mbro nga lart,” shkruan ajo, duke i drejtuar fjalët plot dhimbje bashkëshortit të ndjerë.
Në postimin e saj, e shoqëruar edhe me një fotografi familjare ku shfaqen të tre bashkë – Sindi, Ornel dhe vajza e tyre e vogël – gazetarja tregon vendosmërinë për të vazhduar jetën për hir të vajzës së tyre Aivin.
“Unë do mësoj të jetoj me dhimbjen, por mbi të gjitha do të jetoj me kujtimet e bukura që më le ti. Për ty. Për Aivin,” shprehet ajo.
Ngjarja tragjike ka lënë pa fjalë jo vetëm familjen dhe miqtë e çiftit, por edhe komunitetin e Beratit dhe botën e medias, ku Sindi Salaj ka ndërtuar karrierën e saj.
Humbja e Ornel Caushajt në kulmin e jetës së tij shihet si një dramë e rëndë familjare, ndërsa fjala e fundit që mbetet është ajo e dhimbjes së pashlyeshme që një nënë e re do të mbajë mbi supe, duke u përpjekur të rrisë vajzën e saj me kujtimin e një babai që iku shumë shpejt.
