Tre shkatërrues amerikanë me raketa të komanduara Aegis pritet të mbërrijnë në brigjet e Venezuelës në 36 orët e ardhshme. Kjo lëvizje vjen si pjesë e një operacioni të thelluar të administratës së presidentit amerikan, Donald Trump, kundër karteleve të drogës në Amerikën Latine, të cilat janë cilësuar si organizata terroriste globale.
Sipas burimeve të njohura me çështjen, tre anijet luftarake janë USS Gravely, USS Jason Dunham dhe USS Sampson. Kjo dislokim ushtarak në rajonin jugor të Karaibeve pritet të përfshijë rreth 4,000 marinarë, së bashku me aeroplanë spiunë P-8, anije luftarake dhe të paktën një nëndetëse sulmi.
Reagimet dhe akuzat
Ky angazhim ushtarak, që pritet të vazhdojë për disa muaj, do të operojë në hapësirën ajrore dhe ujërat ndërkombëtare. Një zyrtar amerikan, në kushte anonimiteti, theksoi se këto asete mund të përdoren jo vetëm për operacione inteligjence dhe mbikëqyrjeje, por edhe si platformë nisjeje për sulme të synuara, nëse merret një vendim i tillë.
Nga ana tjetër, Presidenti i Venezuelës, Nicolas Maduro, reagoi duke aluduar në “kërcënimin e çuditshëm të një perandorie në rënie”, pa përmendur drejtpërdrejt anijet luftarake. Ai u zotua se Venezuela do të “mbrojë detet, qiellin dhe tokat tona”.
Administrata Trump e ka vendosur goditjen ndaj karteleve të drogës në qendër të prioriteteve të saj, duke e lidhur atë me kufizimin e migracionit dhe sigurinë e kufirit jugor të SHBA-së. Në shkurt, Karteli Sinaloa i Meksikës dhe banda kriminale venezueliane Tren de Aragua u caktuan si organizata terroriste globale.
Akuzat janë bërë gjithashtu ndaj vetë Presidentit Maduro, të cilin administrata Trump e ka cilësuar si një nga trafikantët më të mëdhenj të drogës në botë, duke ofruar një shpërblim prej 50 milionë dollarësh për arrestimin e tij.